Кітапханалық сабақ-экскурсия: «Бірінші сынып – кітапханада алғаш рет»
Бірінші сынып оқушылары үшін кітапханаға алғашқы рет бару – ерекше әрі маңызды оқиға. 1 «Г» сынып оқушылары бастауыш сынып мұғалімі Бисенбаева Куралай Кельденбекқызымен бірге мектеп кітапханасына экскурсия жасады.
Кітапханашылар балаларды «Кітаптар қаласына» саяхатқа шақырды. Бұл қалада көшелердің орнына — кітап сөрелері, қабаттардың орнына — кітап қоймалары, ал үйлердің орнына — кітап томдары орналасқан.
Саяхат барысында жас оқырмандар кітаптың шығу тарихымен танысып, олар үшін жаңа ұғымдарды білді: абонемент, оқу залы, формуляр, сөре және т.б. Сонымен қатар, кітапты қалай табуға болатынын, кітапхана ережелерін, кітаппен дұрыс жұмыс істеу жолдарын үйренді.
Бірінші сынып оқушылары түрлі балалар кітаптарын қызыға қарап, үлкен әсер алды. Бұл танымдық әрі қызықты саяхат оларға өте ұнады.
Оқуды жақсы меңгерген оқушылар үйге оқуға кітаптар алып кетті.